ذكرياتي الجميلة الجزء الثالث :)

السلام عليكم يا أحلى القراء صار لي فترة ماكتبت لكم عن ذكرياتي الجميلة إشتقت لهذا

القسم اليوم بذكر لكم موقفين يله خلنا نبلش

طاحت بالمصيدة

هذا موقف صارى لي بالثنوي مع رفيجتي الغالية فاتي كل ما ني نشرب ماي ترش علي

وتنحاش وما يمدي أرش عليها وأغرقها فمايحوشها وايد فمرة من المرات رشت علي

وإستغربت إني مارديتها لها ماتدري بالنية السوده سكت وضحكت قالت لي سوسو رشيت

عليج ماي ماراح تردينها لي ضحكت قلت لا عادي وأهي تطالع لي مستغربه شفيها هذي

العادة ما أسكت طنشت وحسستها إني نسيت وعقب قعدنا نسولف وشوي ويت أختها وقعدت

معانا وأنا قاعدة أسولف معاهم وأخطط بنفس الوقت أفكر شلون أردها لها كان ودي بغرقه

مو بس رشه بسيطه بس شلون ياربي لو خذيت الماي بإيدي لين أوصل لها راح يقل طيب

شسوي شسوي وفجأة يتني الفكرة الشيطانيه رحت خذيت كودة كلينكس ورحت أترسها ماي

قلت لهم دقيقة وراده رحت عبيتها بذمه وضمير من غير ولا عصرة الله وكيلكم لا واللي

يضحك أختها المسكينه قاعدة ويت من ظهر رفيجتي وأختها مو مستوعبه ولا أجي فوق

راسها وأعصر المسكينه تغرقت تقولي يمه منج من وين فكرتي فيها أنا أقول بتردينها لي بس

ماتوقعت جذي فصلنا طبعا من الضحك وموقف ما أنساه لليوم ما أنسى تعابير وجها ولا

صدمت إختها ظلينا نضحك لين قلنا بس

اللقاء الأول

أول مادشيت المرحلة الثانوية كانت معاي أختي أنا أولى وأهي رابعة في أول يوم لي كنت

مضايقه لأن ماكان معاي ولا وحده من رفيجاتي من المتوسط وقلت لأختي تعالي لي في

الفرصة الأولي عساس تدليني على صفي وتقعد معاي ولا في الحصة اللي قبل الفرصة

تعرفت على بنت حبوبة وظلينا نسولف وقالت لي تعالي معاي أنا أدل قلت أوكي لما تجي

إختي راح أقول لها تروح يت أختي وكان هذا الحوار : إختي: يله جان أقول لها لا خلاص

بروح مع البنت قالت لي لا أنا أوديج قلت لها لا خلاص ندل وأهي مصرة لا وعافسه الويه

وأنا أقول ياربي شفيها أختي مو جذي وأنا أقول لها روحي وأهي مصرة وتطالع البنت

بنفسية أمبي شفيها وتنحت قالت خلاص أنا أوديكم قلت خلاص أوكي وإحنا ماشين ولا تسأل

البنت إنت أخت فلانه قالت لها إي وهذيج شينت النفس زيادة قلت وي شفيها ولاعقب شفتها

وكنت بروحي وأسالها عسى ماشر خيتو شفيج مشينه النفس على البنت ولا تقولي يعني

خلصت الدفعه كلها لما ترافجين هذي البنت قلت لها شفيها البنت حبوبة وكيوت جان تقولي

أنا توني متهاوشه مع أختها الكورس اللي طاف وأنا أرد نعم حبكت وبعدين إنت من متى

تهاوشين إن شاء الله ترد أختي : لارفيجتي تهاوشت معاها وأنا فزعت أنا : نعم مو صج قلت

حبيبتي كيفج إنت وإياها أنا البنت حبيتها وما فيها شي وفعلا هذي رفيجتي تعرفت عليها من

أول يوم بالثانوي ورفيجات للحين الحمد لله وكل ما أذكر السالفة أضحك وأذكر أختي فيها

وتضحك تقولي أمبي ما أنسى شلون كنت نفسية على البنت حرام وياليت الهوشه تسوى فعلا

هذا الموقف يدللي على إن الدنيا مو صغيرة إلا صغيرة وصغيرة وصغيرة

بس كافي دوخت راسكم إنتظرو بقية الذكريات إن شاء الله

بعدستي :)

السلام عليكم يا أحلى القراء اليوم حبيت أحط لكم مجموعة من الصور المنوعة أرجو أن

تنال إعجابكم ما راح أكثر الكلام أتركمم مع الصور لتستمتعو بها:)

أرجو أن تكونو إستمتعو بالمشاهدة :)

دمتم بخير وسعادة وهناء

بعدسة : كوكتيله:)

فيلم إبن القنصل

السلام عليكم قرائي الغالين :)

وأخيرا تكرمت علينا سنمتنا العزيزة بفيلم عربي :)

أمس نزلو فيلم إبن القنصل بطولة أحمد السقا وغادة عادل :)

قصة الفيلم:

تدور أحداثه عن مزور مشهور بالقنصل لقدرته على تزوير جوازات السفر والتأشيرات

ولكن يتم سجنه وعند خروجه يفاجأة بأن شخص أتى له ليقول أنه إبنه ويحاول أن يثبت

له ذلك فهل ياترى هو فعلا إبنه ؟ وماذا سيحدث له بعد هذه السنين الطويلة التي قضاها

في السجن ؟ وما سر هذا الشخص ؟ هذا ماستعرفونه في الفيلم :)

البرومو هنا :)

رأي في الفيلم :

خفيف وأحلى شيء أن أحمد السقا غير في الشخصية عن ما أعتدنا على رؤيته فيه من

أفلام أكشن وضرب إلى طابع كوميدي عجبني الفيلم وأنصحكم بالمشاهدة :)

دمتم بألف خير وسعادة وهناء يا أحلى القراء:)

فيلم rango

السلام عليكم قرائي الغالين اليوم راح أتكلم عن فيلم rango

قصة الفيلم :

فيلم كرتون ثلاثي الأبعاد يتكلم عن حرباء يريد أن يكون بطل وأن يصبح مشهورا فكتب

عليه أن يشق طريقه في الصحراء ليجد نفسه ويجد الشهرة وفي أثناء ذلك وجد نفسه في قرية

جف مائها فجأة ولم يعرف أهلها سبب ذلك وعن طريق المصادفة أصبح رانجو شريف

القرية وحاول أن يحافظ على ماتبقى لهم من الماء من السرقات فماذا حدث له بعد ذلك ؟ وما

الذي أكتشفه ؟ وهل سيستطيع حماية القرية ؟ وهل سيعرف أين ذهب ماء البحيرة ؟ وماسر

الجفاف الذي حل على هذه القرية ؟ هذا ماستعرفونه في الفيلم

أما عن رأي في الفيلم

لم أكن أتوقعه كذلك فهو في شكله كرتون ولكن قصته للكبار والصغار وأبدع المخرج في

اللقطات فكانت جميلة جدا والألوان رائعة فقد أحتوى الفيلم على مشاهد للطبيعة من مدى

الأتقان نظنها حقيقية أستمتعت بالمشاهدة وأرجو لكم ذلك

دمتم في حفظ الرحمن

ليش تقطها عطها غيرك يستفيد منها ويدعيلك

السلام عليكم ورحمة الله وبركاته

شلونكم يا أحلى القراء

من فترة لاحظت شيء وحبيت أحطكم معاي بالصورة

طبعا إحنا لما نروح المطاعم ويا كثر روحاتنا لها أصلا كل طلعة لازم فيها أكل

ولازم طبعا نجرب أشياء وايد

أو نطلب أشياء وايد

وطبعا المطاعم الأمريكية ماتقصر في الكميات أحجام كبيرة

لاحظت إن في وايد أكل يبقى وفي الغالب ماناخذه معانا نقول محد راح ياكله

في ناس تأخذه معاها تيك أواي حق عقب

أوكي هذا شيء حلو وبالعافية يارب

بس إذا ماتبونه هم أخذوه وعطوه أي عامل

لأن حرام السيرفيز يأخذ الأكل ويحطه فوق بعضه وعلى الزباله على طول

ويكون في وايد حرام أولا خذينا ذنب النعمة اللي إنقطت

ثانيا غيرنا مو لاقي ليش مانعطيه ونونسه

هم لهم حق يأكلون ويذوقون من الأكل اللي إحنا ناكله

والله ياجماعة لاتستصغرون أي شيء زين خلوه تيك أوي وعطوه أي أحد من العمال اللي

في المول أو في الشارع ويامكثرهم

ما أقدر أوصف لكم الفرحه اللي أشوفها في عيونهم لما يأخذون الأكل

أنا عن نفسي بلشت أسوي هذا الشيء من فترة وشفت شلون هذا الشيء يونسهم والله

أكثر من الفلوس بعد

يمسكون الجيس ويحافظون عليه كأنه شيء ثمين

مره كنا في شيليز أنا وأختي وكنا طالبين مقبلات وايد وأغلبها بطاط

وحرام الأكل فيه وايد قلت لها خلنا ناخذه جان تقول لي هذا بطاط ماينمكل بارد

قلت لها خلاص والله قدام عيني إنقط بالزباله يارب لاتحاسبنا

وعقب المطعم رحنا نصلي ولا أشوف اللي تشتغل في المصلى خاشه جيس فيه شويه

بطاط ينعدون على أصابع الإيد الوحده وحاطتهم البنت في علبه على صوب عشان تاكلهم

عقب ما أبي أقولكم شلون قلبي أنعصر ومسكت إختي وقلت لها تعالي أراويج شيء

وراويتها العلبة قلت لها شوفي اللي إحنا عبالنا محد ياكله غيرنا ربعه خاشه لاتقوليلي

برد ولا ماينمكل فعلا الإنسان لايقلل من قيمة الشيء

إحنا عشان الله ناعم علينا نأكل وكميات وعبالنا أذا شويا محد ياكله لا في ناس ودها

بهالشويه تكفيها

فليش تقطها عطها غيرك يستفيد منها ويدعيلك

ودي لو نتكاتف مع بعضنا وننمي هذا السلوك نشعر بغيرنا أكثر ونحب لهم اللي نحبه

لنفسنا ياريت تكونون معاي في هذي الحمله والله ناويه أنشرها في كل مكان أقدر أوصله

والله المعين :)

اللهم أنا نسألك فعل الخيرات وترك المنكرات وحب المساكين وأن تغفر لنا وترحمنا

وترزقنا جنات الخلد ونعيم لاينفذ وأخر دعوانا أن الحمد لله رب العالمين والصلاة والسلام

على خير الخلق والمرسلين محمد صلى الله عليه وسلم وعلى آله

وصحبه الكرام أجمعين :)

big momma's2

السلام عليكم قرائي الغالين اليوم بتكلم عن فيلم big momma's2

قصة الفيلم :

تدور أحداث الفيلم عن شرطي وإبن زوجته يحاول التخفي من المجرمين بزي إمرأة بعد

أن تم كشف أمرهم من قبل المجرمين ويبدأو رحلة البحث عن معلومات هامه في معهد

البنات للموسيقى ويحاولو التعرف على البنات ومحاولة التقرب إليهم ليعرفو مكان

المعلومات التي يرغبون بالحصول عليها ونشاهد مايحدث لهم من مواقف

طريفة وكوميديه أثناء البحث

رأي في الفيلم :

فيلم خفيف مضحك وقصة جيدة إستمتعت أثناء مشاهدته وضحكت على كثير من المواقف

فأحببت أن تشاركوني متعتي

دمتم في حفظ الرحمن

عيدي يا كويت يا أحلى بلد :)

السلام عليكم يا أحلى القراء

كل عام والكويت بألف خير وسعادة

كل عام وإحنا نحبج يا كويت

كل عام وأنت أحلى الأوطان

يارب الأعياد دوم في دارنا الكويت

وياعسى ربي يحفظج من كل عين

ويارب دوم منورة ودوم درة مكنونه

يا أحلى أسم تنطقه شفاي

يا أجمل مكان شافته عيني

ياللي سكنتي القلب وتربعتي على عرشه

ياكويت يا أحلى ما خلق ربي في هل الكون

أحبج يابلادي وأعشق ثراكي

يارب دوم بلد الأمن والأمان

وعسى عيدج سعيد وكل عام وإنت تاج الروس

اللهم أحفظ لنا ديرتنا دوم وأدم علينا نعمة الأمن والأمان وأغفر للشيخ جابر والشيخ سعد

وأدخلهم فسيح جناتك وأحفظ لنا الشيخ صباح وأرزقه البطانة

الصالحة التي تعينه على الخير يارب العالمين

وأصرف عنا كل سوء اللهم من أرادنا وبلادنا وأهلنا بسوء فأشغله في نفسه وأجعل

تدبيره تدميرا عيه وأبعد عنا الفتن وأدفع عنا الغلا والوباء اللهم أمين يارب العالمين

عشتي لنا ياكويت حرة أبيه

اللهم لك الحمد على نعمة الحرية والأمان اللهم أدمها علينا ياكريم وإبعد عنا كل طامع

وحاسد وحاقد ياكريم :)

وكل عام وأنتو بألف خير يارب