إشلونكم قرائي الأعزاء :)
اليوم راح أتكلم عن فيلم طير انت هذا الفيلم نزل عندنا في الكويت من قبل شهرين أو أكثر شوي بالسينما
وحاولت كذا مره أروح له بس ماصار نصيب :(
وأخر محاولة كانت تضحك وتبين مدى تطور السينما عندنا ومدى إلإلتزام بالمواعيد
يومها دقينا وسألناهم الفيلم موجود متي وفي أي سينما لأن كان نازل من فترة فخفنا يكون
إنشال جان يقولنا الساعة 7 في الأفينيوز
رحنا هناك وفعلا الشاشات اللي تعرض مواعيد الافلام كاتبه فعلا نفس الموعد:)
ووقفنا في الطابور ولما وصلنا للشباك ولا يصدمنا اللي يحجز ويقول هذا الفيلم أصلا مو موجود شلناه ؟
نعم ؟
إنزين ليش حاطين صورته والمواعيد عند السينما ؟
جان يقول لا مخربطين عادي
حجزنا فيلم ثاني في نفس الموعد
ولما يينا ندش لقينا قاعة من القاعات حاطين عليها صورة الفيلم ونفس الموعد ؟
مافهمنا بصراحة الحين الفيلم موجود ولا لا ؟
المهم دوختكم معاي بس كان لازم أنوه عن إبداع سينمتنا العزيزة :)
أمس أختي يابت الفيلم دي في دي شفته وحييييييييييييل عجبني
الكوميديا اللي فيه حلوة ومحترمه ويضحك من القلب فقلت أقولكم عنه عشان اللي ماشافه يشوفه
أبطال الفيلم
أحمد مكي
دنيا سمير غانم
ماجد الكدواني
لطفي لبيب
والمؤلف المبدع
هذا المؤلف حبيت كتاباته قرأت له كتاب إسمه جر ناعم روعة من كثر ماشدني ما قدرت
أخليه إلا لما خلصته:)
الفيلم تدور أحداثه حول شاب بسيط توفى والديه في الصغر ورباه جده وإرتبط فيه حيل
وبعدين مات جده وظل وحيد لم يكن له
أصحاب ويعمل دكتور بيطري فشاف بنت في العياده كل مره تجي تعاج كلبها حبها وحاول
يبينلها حبه بس ماعرف وفي يوم ميلاده
طلع له عفريت وقاله بحقق لك أمنيه أنك تخليها تحبك بس من خلال لفت نظرها لك أكثر
من جذي ما أقدر ولك سبع فرص
فكل مرة يحوله لشخصية مختلفة وفيها صفات غير عن اللي قبلها
وبصراحة حيل تضحك الشخصيات :)
الفيلم الهدف منه إنك ترضى بنفسك مثل ما أنت وإنك ما تحاول تكون شخص ثاني غير
نفسك وإبحث عن مميزاتك وإبرزها
وايد عجبني وأنصح كل اللي ما شافه يشوفه وماراح يندم ومابي أحرق لكم إياه أكثر :)
بس في النهايه أبي راي اللي شاف الفيلم وشنو أكثر شخصيه ضحكته وشنو أكثر شي عجبه في الفيلم
وفي إنتظار تعليقاتكم :)
