الاثنين، 27 شتنبر، 2010

ذكرياتي الجميلة الجزء الثاني :)

السلام عليكم :)




من فترة كنت بدأت سلسة ذكرياتي الجميلة :)




وهانحن نعود من جديد




يله نبلش:)




بسم الله الرحمن الرحيم


أول مرة أهلي يكتشفون إني عصماوية ( أكتب باليسار )








كانت في بداية العام الدارسي في الصف الأول الإبتدائي




ضمدو كف إيدي اليمين عشان أصابعي أنجرحت




وطبعا قعدوني في البيت لأن روحتي ماله داعي منها




وأنا أدري أنهم مقعديني عشان ماراح أعرف أكتب وأنا ساكته ومستانسه :)




المهم طبعاماكو مدرسة يعني لعب ووناسه




وظل الحال على ماهو عليه لمدة أربع أيام




بعدها مليت من قعدة البيت وقلت خلاص عاد برد المدرسة




رحت لأمي وقلت لها : أنا أبي أرد المدرسة بكرة




أمي : لاحبيبتي مايصير




أنا : لا أنا زهت أبي أروح




أمي : تروحين شتسوين ماراح تعرفين تكتبين




أنا : لا أعرف أكتب عادي




أمي في طور إكتشاف السر الخطير : شلون ماما إيدك لافينها مايصير




أنا وبمنتهى البساطة : ومنو قالك إني أكتب بهذي أنا أكتب بهذي




أمي : نعم وليش ماقلتي لينا ؟




أنا : عشان أقعد من المدرسة




أمي وأهي تضحك: والحين عقب مامليتي جاية تقولين




********


شكرا دكتوري الفاضل

******




مرة كنت رايحة أراجع ورقة أمتحاني عند الدكتور الرائع عبد الباسط في قسم الإعلام


وقعدت بسطت عدل لأن أنا طبعي لازم أشيك عدل يمكن في شيء غلط


درجة مني ولامناك أقدر أستردها إذا أنا مو غلطانه طبعا


بس نوعي إذا غلطانه أسكت ما أحب أطالب بشيء مو لي بس


أهم شيء أقتنع إني غلطانه


المهم راجعنا كل شيء وتنحت على إجابة سؤال أنا متأكدة ومقتنعة أنها صح وأهو مو
مقتنع وظلينا يقنعني وقنعه كان عليها نص درجة بس أنا لما أكون متأكده أنه صح ما
أخلى حقي لو شنو


المهم وصلنا إلى نتيجة أنه قاعد يقنع أنه أنا غلط بس بأدب ولما يئست


قلت له يعني أنا أجابتي غلط ؟


قلتها بعد ما صابني أحباط كبير وشكله لاحظ هذا الأمر بدون ما أقصد


يمكن من شكلي أنا وجهي معبر :(


لقيته قال لي


لا لا أنت بنت شاطرة وإذا هذا راح يسبب لك إحباط


خلاص هذي النص درجة بس أهم شيء أنت تظلين شاطرة ومتميزة


تخيلو أنا ماقلت له شيء ولا أني أحبط ولا شيء


أنا بس سكت وقلت خلاص


بس أهو فعلا دكتور فاهم ودارس


أهم شيء عنده مصلحة الطلبة


ويقدر الشطار ويبيهم يتطورون


ما أقدر أقولكم هل موقف شكثر فرق معاي


مو عشان نص درجة عشان التقدير شيء وايد مهم


عندي وفعلا خلاني هل موقف أشد حيلي أكثر وأكثر


لأن في ناس تقدر


وكتبت هل بوست عنه عشان كل ما شفته أذكر أن في ناس للحين يقدرون وزينين


فأسأل الله أن يبسط له في رزقة فقد أدخل السعادة على كثيرا بموقفه هذا


قد يكون عند البعض بسيط ولكن عندي كبير جدا لأن التقدير أهم شيء عندي




وبهذا أكون قد أنتهيت من الجزء الثاني من ذكرياتي السعيدة


وأعدكم بالمزيد إن شاء الله :)


كونو بالإنتظار :)


دمتم بخير وسعادة يا أحلى القراء :)