الجمعة، 23 أبريل 2010

أفلام الصيف










السلام عليكم




بما ان الصيف قرب والأفلام العربية في سباق مع الزمن للنزول كنت قاعدة أتناقش مع
أختى في هذا الموضوع





العاده كل سنه في الصيف أنزل مصر أشطب على الأفلام وكنت أستانس حيل كانت الطلعة
عبارة عن فيلم ومطعم أو كافيه وكنت أنطر الصيف على أحر من الجمر عشان أشوف
الافلام فأنا من عشاق الفن السابع




كانت الأفلام كوميديا حلوة وخفيفة ومحترمة




أو قصص بس هم حلوة ومن غير عنف



نطلع من الفيلم مغيرين المود ومستانسين



ولكن للأسف في أخر سنين وخاصة نقدر نقول أخر سنتين صارت الأفلام أفلام سوق أفلام
تجارية بحته


وطلعو في موضة جديدة الفيلم يا عنف يا قلة أدب لازم تختار واحد من الأثنين لأن مافي
ثالث





طيب واللي ما يبي هذا ولا هذا شنو يسوي ؟



يعني الواحد بدال لايدش السينما يغير جو يطلع منكدين عليه :(



طيب ليش ؟



لازم يكون في تنوع أكثر في المضامين ولازم يراعون جميع الأذواق يعني فعلا هالسنتين
نادر جدا ما شفت فيلم وعجبني وكان راقي في طرحة


يمكن منهم الفيلم اللي تكلمت عنه في بوستي الماضي ( طير إنت )
وفيلم رمضان مبروك أبو العلمين
ولاد العم
وميكانو
وبعض الأفلام البسيطة اللي ماتتجاوز نسبتها 5% من مجموع الأفلام اللي تنزل


فانا قلت لنفسي أن المشكلة فينا أحنا أحنا اللي ندش الافلام ونكسبهم ولا لو موشايفين
الأقبال بهالشكل ما أستمرو


وبعدين اللي يضحكني أني كنت لما أروح أحجز كنت أسمع ناس يقولون الفيلم مبين
سخيف بس بندشه وخلاص كأن أمر واقع لأن ماكو بديل لا اكو بديل طلعت تمشي ومطعم
ولا كافيه ولا قعدة حلوة على البحر ولا أي شيء ثاني يعني مو لازم سينما

بصراحة أنا قررت قرار مهم وأهو أن الفيلم أذا كان عنف ولا سخيف ماني داشته عشان
لا أربحهم ويحترمون تنوع المشاهدين وأذواقهم


وأرجو اننا نشجع بعض على هل موضوع عشان يحترمون عقلية المشاهد ويرتقون بما
يقدمونه لنا من أفلام لاننا ناس نفهم يعني ماراح يوجهونا للي يبونا ونسمع كلامهم :)







وسلامتكم :)

هناك 12 تعليقًا:

BookMark يقول...

أولا فقدناج وعسى المانع خير :)


ثانيا

أوافقج بللي قلتيه ،، الأفلام صارت تجارية حيل ومافيها أي مضمون .. وعلى قولتج الناس اتدش الفلم وبس حتى لو كانت تدري انه سخيف !!

حملة حلوة ولازم نسويها .. لازم يحترمون عقلية المشاهد

يعطيج العافية :)

شاي الضحى يقول...

ولكم باك

وكلامج عدل 100%


انا ما ادش الفلم الا لما اسمع عنه وااااااايد واقره عنه

واشوف تقييمه بالموقع الرسمي نسيت اسمه

اذا الفلم اقل من 7 من 10 ما اروح له


شكرا :>

العلم نور يقول...

لقد فقدنا متعت الأفلام .. لكثرة الغثاء الذي أصبح يحبط الذوق العام

كوكتيل يقول...

أهلين بالغالية bookmark

والله أنا اللي ولهت عليكم خير بس كنت حيل مشغولة الفترة اللي طافت بس مانسيتكم والله على طول ببالي :)


بصراحة حيل وضع السينما صاير رديء أنا وحدة كنت أعشق السينما وأموت عليها عقب كل إمتحان في الجامعة كنت أكافىء نفسي بفيلم أتونس فيه :(


بس لازم نوقف وقفه نعلمهم يحترمون أذواقنا وإن إحنا ماراح ندش بس جذي عشان نضيع وقتنا وخلاص ولما يخسرون راح يردون للافلام الزينة :)



وأشكرك جدا لأنك أول المشتركين بالحملة


فأنتي دائما بالمقدمة عزيزتي :)


وشكرا لأنك تنورين مدونتي دائما :)

كوكتيل يقول...

أهلين شايونة

والله زين تسوين لو الكل يسوي مثلك

ما صار هذا حال السينما لأنهم راح يخسرون أذا حطو
فيلم ما يدشه أحد لانه سخيف أو فيلم تجاري


عيل أنت معانا بالحملة إن شاء الله

مرورك دائما يسعدني :)

كوكتيل يقول...

أهلين بدندنة قيثارة الوجد :)


أوافقكي الرأي تماما الافلام صارت كلها أغاني ورقص ليش ما أدري


أنا داشه فيلم مو مجموعة فيديو كليب ؟

ولا داشه فيلم غنائي ؟

ولا داشه كبارية على كل هالرقص ؟


انا ضد هذا الأمر تماما

أنا داشه أشوف قصه حلوة ممكن يكون في أغنية وحدة مو أكثر وأذا الفيلم محتاجه ويفضل لا


صار في لبس في المفاهيم والتصنيفات يعني في فعلا أفلام أسمها الأفلام الغنائية

وافلام خيال وأفلام رعب وأفلام عاطفية وغيرها من التصنيفات بس الحين كلهم صارو غنائي شيء غريب فعلا


أرجوا أن تكوني معانا في حملتنا ضد الأفلام الرديئة والتجارية :)

ونورتي المدونة عزيزتي :)

دندنة قيثارة الوجد يقول...

لي الشرف غاليتي كوكتيل على أن أكون جزء من الكل الصالح .. بارك الله فيك

رورو الشخبوطه يقول...

السلام..

هم عندج حسن ومرقص حلو مع انه مال عادل امام :\

وافلام ديزني تشوق متعوب عليه ..

المشكله انه سينماعندنا تقدم افلام بايته ومقطعه ع غير سنع ..

بس تطورنا وصار عندنا 3d ..

وهالحمله موبس من المشاهد لازم الكاتب والممثل يهتم باللي يسويه ويختار الانسب ويحترم عقليه المشاهد..

لانه متعتنا الوحيده السينما :(

مرسو..

كوكتيل يقول...

أهلين بالعزيزة


دندنة قيثارة الوجود

وفيك يارب :)


لك جزيل الشكر والتقدير :)


وشكرا على التواصل الغالي :)

كوكتيل يقول...

أهلين رورو

فعلا أنا حبيت حسن ومرقص كان يناقش قضية وبشكل حلو وواقعي جدا

وهم احمد عز متميز في أفلامه


انا معاك بس لازم البداية تكون برد فعل جماعي من الجمهور عشان الكاتب يحسن المضمون


ولا لو الكاتب لقى اللي يشتري أفلامه وينتجها وما عنده ذمه شيلي راح يخليه يحترم المشاهد إذا المشاهد نفسه مو مقدر عقليته ومحترمها ؟



وشكرا على التواصل الغالي :)

Made n Q8 يقول...

والله زين تسوين

انا خو من زمان قاطعه الافلام المصرية مااحبها احس كله بووق من الافلام الاجنبيه!!

بس اخر فيلم مصري شفته اهوا فيلم دكان شحاته وشفته غصبن علي من كثر ماخبوني فيه البنات شوفي هيفا وشوفي هيفا ..وشفتها وبعدين يعني ماعندها غير الفصاعه!!

كوكتيل يقول...

أهلين

made n Q8



أنا أشجع الأفلام الحلوة والسينما الحلوة :)


أشجع الأفلام اللي تونس بأسلوب راقي


نورتي المدونة عزيزتي